ឯកឧត្តមរដ្ឋមន្ត្រី ថោង ខុន ដាក់ចេញអនុសាសន៍៥ចំណុច ដល់សមាគមទេសចរណ៍កម្ពុជា ដើម្បីជាធាតុចូលសម្រាប់សកម្មភាពការងារក្នុងឆ្នាំ២០២៣

(ភ្នំពេញ)៖ ឯកឧត្តម ថោង ខុន រដ្ឋមន្រ្តីក្រសួងទេសចរណ៍ បានដាក់ចេញនូវអនុសាសន៍ណែនាំបន្ថែមចំនួន៥ចំណុច ដល់សមាគមទេសចរណ៍កម្ពុជា (CATA) ដើម្បីជាធាតុចូលសម្រាប់សកម្មភាពការងាររបស់សមាគម នាឆ្នាំ២០២៣ខាងមុខនេះ និងឆ្នាំបន្តបន្ទាប់ទៀត សំដៅធ្វើយ៉ាងណាឱ្យការអនុវត្តន៍ការងារកាន់តែទទួលបានភាពជោគជ័យ។
ឯកឧត្តមរដ្ឋមន្ត្រី ថោង ខុន បានដាក់ចេញនូវអនុសាសន៍ណែនាំយ៉ាងដដូចនេះនាល្ងាចថ្ងៃទី២១ ខែធ្នូ ឆ្នាំ២០២២ នាឱកាសដែលោកអញ្ជើញជាអធិបតីក្នុងកម្មវិធីរាត្រីជួបដៃគូអាជីវកម្មមិត្តអ្នកជំនួញប្រចាំឆ្នាំរបស់សមាគមទេសចរណ៍កម្ពុជា ដែលបានរៀបចំឡើងសណ្ឋាគារ Raffles Hotel Le Royal និងដោយមានការចូលរួមពីលោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា រួមទាំងមានសមាជិកសមាគមទេសចរណ៍កម្ពុជា ជាច្រើនរូបទៀតផងដែរ។
អនុសាសន៍ណែនាំសំខាន់ៗរបស់ឯកឧត្តមរដ្ឋមន្ត្រី ថោង ខុន ក្នុងកម្មវិធីរាត្រីជួបដៃគូអាជីវកម្មមិត្តអ្នកជំនួញប្រចាំឆ្នាំរបស់សមាគមទេសចរណ៍កម្ពុជា រួមមាន៖
១៖ សូមសមាគមផ្តល់កិច្ចសហការបន្ថែមជាមួយក្រសួងទេសចរណ៍ក្នុងការជំរុញការរៀបចំ «ឆ្នាំទស្សនាកម្ពុជា២០២៣ ក្រោមពាក្យស្លោក កីទ្បា និងព្រឹត្តការណ៍ Sport and Festival» ឱ្យបានជោគជ័យ។ បច្ចុប្បន្នក្រសួងទេសចរណ៍កំពុងរៀបចំវិធានការគោលនយោបាយអនុវត្តឆ្នាំទស្សនាកម្ពុជា២០២៣នេះ និងគ្រោងដាក់ឱ្យអនុវត្តក្នុងពេលឆាប់ៗនេះ។
២៖ សូមរៀបចំសកម្មភាពផ្សព្វផ្សាយ និងទាក់ទាញទេសចរអន្តរជាតិទ្បើង វិញឱ្យបានឆាប់រហ័ស ដើម្បីចាប់យកឱកាសទីផ្សារក្នុងតំបន់និងសកល ខណៈនិន្នាការធ្វើដំណើរនៅតែមានសន្ទុះខ្លាំងរួមមានទីផ្សារក្នុងតំបន់អាស៊ាន ចិន និងឥណ្ឌា ជាដើម ពិសេសសូមចូលរួមផ្សព្វផ្សាយឱ្យបានសកម្មជាមួយដៃគូក្រៅប្រទេសពីសកម្មភាព ឆ្ពោះទៅកាន់ការរៀបចំព្រឹត្តការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ក្នុងឆ្នាំ២០២៣ នៅកម្ពុជា។
៣៖ សូមឱ្យសមាគមបន្តជំរុញឱ្យបុគ្គលិករបស់អាជីវកម្មទេសចរណ៍ចូលរួមវគ្គបណ្តុះបណ្តាល ដើម្បីទទួលបានជំនាញថ្មី និងអភិវឌ្ឍន៍ជំនាញដែលមានស្រាប់ និងចូលរួមដល់ការពង្រឹងគុណភាពសេវាកម្មទេសចរណ៍ឱ្យស្របតាមស្តង់ដា។
៤៖ សូមជំរុញឱ្យអាជីវកម្មទាំងអស់ដែលជាសមាជិក បន្តអនុវត្តឱ្យបានត្រឹមត្រូវតាមនីតិប្រតិបត្តិស្តង់ដា (SOP) ដាក់ចេញដោយក្រសួងទេសចរណ៍ ដើម្បីឱ្យស្របតាមបរិបទនៃការរៀនរស់ជាមួយកូវីដ-១៩ តាមគន្លងប្រក្រតីភាពថ្មី។
៥៖ សូមសមាគមបន្តកិច្ចសហការជាមួយក្រសួងទេសចរណ៍ក្នុងការរៀបចំ សកម្មភាពផ្សព្វផ្សាយទេសចរណ៍រួមគ្នា រួមមាន៖ ការផ្សព្វផ្សាយតាមប្រព័ន្ធឌីជីថល និងការទទួល Farm Trip ជាដើម។ លោកយល់ថា គួរបង្កើតក្រុមការងារមួយសម្រាប់ផ្តល់កិច្ចសហការលើការងារផ្សព្វផ្សាយនេះផងដែរ។
ជាមួយគ្នានោះដែរឯកឧត្តម ថោង ខុន ក៏បានកោសសើរ និងថ្លែងអំណរគុណចំពោះសមាគមទេសចរណ៍កម្ពុជា ដែលតែងតែផ្តល់កិច្ចសហការយ៉ាងសកម្ម គាំទ្រសកម្មភាពការងារនានារបស់ក្រសួងទេសចរណ៍ និងបានកសាងស្នាដៃជាច្រើនក្នុងការជំរុញនិងផ្សព្វផ្សាយវិស័យទេសចរណ៍កម្ពុជានៅថ្នាក់ជាតិ តំបន់ និងពិភពលោក និងបានបង្ហាញជំជឿជាក់ថាក្រោមដំបូលនៃសន្តិភាព និងក្រោមការដឹកនាំប្រកបដោយភាពឈ្លៀសវៃ និងគតិបណ្ឌិតរបស់សម្តេចតេជោនាយករដ្ឋមន្រ្តី «យើងទាំងអស់គ្នានឹងអាចឆ្លងផុតគ្រាដ៏លំបាកនេះ» និងរៀបចំឆ្ពោះទៅកាន់អនាគតថ្មីនៃវិស័យទេសចរណ៍ដូច ដែលបានកំណត់ក្នុងផែនទីចង្អុលផ្លូវដំណាក់កាលទី៣ (២០២៤-២០២៥)ផងដែរ។
នាឱកាសនោះដែរលោកជំទាវ ឆាយ ស៊ីវលីន បានឱ្យដឹងដែរថា សម្រាប់សមាគមន៍ CATA ជាផែនការបន្ទាប់សម្រាប់ឆ្នាំ២០២៣រួមមាន៖ សមាគមនិងទទួលរៀបចំធ្វើ Farm Trip សម្រាប់ទីភ្នាក់ងារទេសចរ មកពីបណ្ដាប្រទេសអាស៊ាន ដើម្បីធ្វើបច្ចុប្បន្នភាពទៅលើសេវាកម្ម និងផលិតផលទេសចរណ៍ថ្មីៗនៅកម្ពុជា, បង្កើនកម្មវិធីផ្គូផ្គងដៃគូអាជីវកម្មទេសចរណ៍ ជាមួយនឹងបណ្ដាប្រទេសអាស៊ាន ដើម្បីបង្កើនទីផ្សារ និងកិច្ចសហប្រតិបត្តិការ, បង្កើនទំនាក់ទំនងទីផ្សារឥណ្ឌា ដើម្បីអនុវត្តន៍អនុស្សរណៈយោគយល់គ្នា ដែលបានព្រមព្រៀងចុះហត្ថលេខា រវាងសមាគមCATA និងរដ្ឋម៉ាត់យ៉ាប្រាដេស នៃប្រទេសឥណ្ឌា នាពេលកន្លកងទៅ, ភ្ជាប់ទំនាក់ទំនងទៅកាន់ទីផ្សារ ទេសចរក្នុងប្រទេសឥណ្ឌាសិក្សាទីផ្សារដើម្បីជំរុញ និងគាំទ្រឱ្យមានការហោះហើរត្រង់កម្ពុជា ទៅកាន់ប្រទេសឥណ្ឌា និងឥណ្ឌាមកកាន់កម្ពុជា, បន្តបង្កើតទីផ្សារកម្មវិធីបណ្តុះបណ្តាលវគ្គខ្លីៗឱ្យបានច្រើនដើម្បីបំពេញតម្រូវការជាក់ស្ដែង, បន្តឡើងវិញនូវសកម្មភាពបញ្ជ្រាបការយល់ដឹងពីការទុកដាក់កាកសំណល់, ផ្តល់ការគាំទ្រសម្រាប់ការផលិត ផលិតផលក្នុងស្រុក សម្រាប់សហគមទេសចរណ៍ ដើម្បីទទួលបានចំណូលបន្ថែមផងដែរ៕
https://t.me/motgovkh
អត្ថបទ៖ FreshNews

This website, Tourismcambodia.org, the official website of Ministry of Cambodia of the Kingdom of Cambodia, is designed and maintained collaboratively by RED DOT (Cambodia) Co., Ltd and Cybernetics Ltd a full service branding and advertising agency in Cambodia. While efforts are made to ensure that all the information hereto are good, accurate and up to date, by visiting the website Tourismcambodia.org, viewing, accessing or otherwise using any of the services or information created, collected, compiled or submitted to Tourismcambodia.org, you agree to be bound by the our Terms and Conditions of Use, (Click here). If you do not want to be bound by our Terms, your only option is not to visit, view or otherwise use the services of Tourismcambodia.org. You understand, agree and acknowledge that these Terms constitute a legally binding agreement between you and Tourismcambodia.org and that your use of Tourismcambodia.org shall indicate your conclusive acceptance of this agreement.