កម្ពុជាចូលរួមផ្សព្វផ្សាយសក្តានុពលទេសចរណ៍ និងព្រឹត្តិការណ៍អន្តរជាតិក្នុងស្រុកនានាដែលគ្រោងនៅឆ្នាំ២០២២ និង ២០២៣ ទៅកាន់ទីផ្សារចិន

(ចិន)៖ ក្រសួងទេសចរណ៍ សហការជាមួយក្រសួងការបរទេស និងសហប្រតិបត្តិការអន្តរជាតិ ព្រមទាំងស្ថានអគ្គកុងស៊ុលកម្ពុជាប្រចាំខេត្តសាន់ស៊ី បានចូលរួមក្នុងព្រឹត្តិការណ៍ពិព័រណ៍ទេសចរណ៍អន្តរជាតិវិថីសូត្រស៉ីអានលើកទី៤ ឆ្នាំ២០២១ (XSRITE 2021) ដែលប្រព្រឹត្តទៅរយៈពេលបីថ្ងៃ ចាប់ពីថ្ងៃទី១៦-១៨ ខែកក្កដា នៅទីក្រុងស៉ីអាន ខេត្តសាន់ស៊ី នៃសាធារណរដ្ឋប្រជាមានិតចិន។

ឯកឧត្ដម ថោង រដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួងទេសចរណ៍ បានបញ្ជាក់ថា អ្វីដែលចំណុចសំខាន់ក្នុងការផ្សព្វផ្សាយទៅកាន់ទីផ្សារទេសចរណ៍ចិននេះ រួមមាន៖

* រាជរដ្ឋាភិបាលកម្ពុជាបានសម្រេចអនុញ្ញាតឱ្យក្រសួងទេសចរណ៍រៀបចំធ្វើជាម្ចាស់ផ្ទះ «វេទិកាទេសចរណ៍អាស៊ានឆ្នាំ ២០២២» នៅខេត្តព្រះសីហនុ ចាប់ពីថ្ងៃទី១៦-២២ ខែមករា ឆ្នាំ២០២២។ វេទិកាទេសចរណ៍អាស៊ាននេះ នឹងធ្វើឡើងក្រោមប្រធានបទ «អាស៊ាន៖ សហគមន៍សន្តិភាព និងវាសនារួមគ្នា» ដែលមានគោលបំណងដើម្បីស្តារ និងបើកឡើងវិញនូវវិស័យទេសចរណ៍ក្នុងតំបន់ ឆ្ពោះទៅរកអនាគតប្រកបដោយនិរន្តរភាព និងទំនួលខុសត្រូវ។

* បន្ទាប់ព្រឹត្តិការណ៍ទេសចរណ៍នេះ កម្ពុជាក៏នឹងធ្វើជាម្ចាស់ផ្ទះរៀបចំការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលនឹងប្រព្រឹត្តទៅចាប់ពីថ្ងៃទី០៥-១៧ ខែឧសភា និងថ្ងៃទី០១-១០ ខែមិថុនា ឆ្នាំ២០២៣ ក្រោមប្រធានបទ «កីឡារស់ក្រោមសន្តិភាព»។

* ការដែលកម្ពុជាទទួលធ្វើជាម្ចាស់ផ្ទះរៀបចំព្រឹត្តិការណ៍ទាំងនេះ គឺដោយសារការពិនិត្យឃើញសន្ទុះនៃការចាក់វ៉ាក់សាំងជូនប្រជាពលរដ្ឋដែលមានអាយុចាប់ពី ១២ ឆ្នាំឡើងទៅ ទូទាំងប្រទេសកម្ពុជា មានសន្ទុះលឿនរហ័ស ពោលគឺគ្រោងនឹងបញ្ចប់នាចុងឆ្នាំ២០២១ ខាងមុខនេះ (តាមការកំណត់ឱ្យបាន ១០ លាននាក់)។

សូមជម្រាបថា ព្រឹត្តិការណ៍ XSRITE 2021 នោះ មានការចូលរួមពីអ្នកទិញ អ្នកលក់ជាតិ-អន្តរជាតិជាច្រើន រួមមាន ស្តង់ពិព័រណ៍ចំនួន ៥០០ ស្តង់ អ្នកលក់ក្នុងស្រុកចំនួន ៣០០ និងប្រព័ន្ធផ្សព្វផ្សាយក្នុងស្រុកចំនួន ៣០ ក្នុងចំណោមស្ដង់ទាំងនោះ ស្តង់របស់ប្រទេសកម្ពុជាបានផ្សព្វផ្សាយគោលដៅទេសចរណ៍វប្បធម៌ និងធម្មជាតិដ៏សម្បូរបែបរបស់កម្ពុជា។ ព្រឹត្តិការណ៍ទេសចរណ៍នេះដែរ គេរំពឹងថានឹងទទួលបានភ្ញៀវទេសចរជាង ២០,០០០ នាក់។

នៅថ្ងៃទី១ នៃព្រឹត្តិការណ៍ពិព័រណ៍នេះ ស្ថានអគ្គកុងស៊ុលកម្ពុជាប្រចាំខេត្តសាន់ស៊ី បានចូលទស្សនាស្តង់ពិព័រណ៍ក្រសួងទេសចរណ៍កម្ពុជា ហើយបន្តទស្សនាការសម្តែងសិល្បៈនានាផងដែរ។ នៅថ្ងៃទី១៨ ខែកក្កដា ដែលជាថ្ងៃទី៣ នៃព្រឹត្តិការណ៍ពិព័រណ៍នេះស្តង់ពិព័រណ៍ក្រសួងទេសចរណ៍កម្ពុជាបានទទួលពានរង្វាន់ចំនួន ២ គឺពានរង្វាន់ស្តង់ដែលមានមានការតុបតែងល្អបំផុត (Best Organized Booth) និងពានរង្វាន់ស្តង់ដែលស្អាតបំផុត (Best Outstanding Booth) នេះ គឺជាជោគជ័យដ៏ធំមួយសម្រាប់កម្ពុជា។

ក្រៅពីកម្ពុជា ប្រទេសជាសមាជិកអាស៊ានដែលបានចូលរួមជាភ្ញៀវអន្តរជាតិក្នុងការតាំងពិព័រណ៍នេះ រួមមាន ប្រទេសថៃ ឥណ្ឌូណេស៊ី និងម៉ាឡេស៊ី៕

This website, Tourismcambodia.org, the official website of Ministry of Cambodia of the Kingdom of Cambodia, is designed and maintained collaboratively by RED DOT (Cambodia) Co., Ltd and Cybernetics Ltd a full service branding and advertising agency in Cambodia. While efforts are made to ensure that all the information hereto are good, accurate and up to date, by visiting the website Tourismcambodia.org, viewing, accessing or otherwise using any of the services or information created, collected, compiled or submitted to Tourismcambodia.org, you agree to be bound by the our Terms and Conditions of Use, (Click here). If you do not want to be bound by our Terms, your only option is not to visit, view or otherwise use the services of Tourismcambodia.org. You understand, agree and acknowledge that these Terms constitute a legally binding agreement between you and Tourismcambodia.org and that your use of Tourismcambodia.org shall indicate your conclusive acceptance of this agreement.