(ខេត្តព្រះសីហនុ)៖ កាលពីថ្ងៃសុក្រ ១០រោចខែអាសាឍ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២៦ ខែកក្កដា ឆ្នាំ២០១៩ ក្រសួងទេសចរណ៍ សហការជាមួយរដ្ឋបាលខេត្តព្រះសុីហនុ មន្ទីរទេសចរណ៍ខេត្តព្រះសុីហនុ បានរៀបចំសិក្ខាសាលាផ្សព្វផ្សាយ និងបណ្តុះបណ្តាលស្តីអំពី "ស្តង់ដាធុរកិច្ចបៃតងក្នុងវិស័យទេសចរណ៍ ស្តង់ដាបដិសណ្ឋារកិច្ចល្អក្នុងវិស័យទេសចរណ៍ និងស្តង់ដាបង្គន់សាធារណៈកម្ពុជា" ក្រោមអធិបតីភាព លោក ម៉ាង សុីណេតអភិបាលរង ខេត្តព្រះសីហនុ និង លោក ហ៊ួត រិទ្ធី ប្រធាននាយកដ្ឋានសេវាគាំពារទីក្រុងស្អាតនិងជម្រុញការប្រលងប្រណាំង ក្រសួងទេសចរណ៍ដោយមានការចូលរួមពីតំណាងមន្ទីរទេសចរណ៍ទាំង៤ខេត្ត រួមទាំងអង្គភាពពាក់ព័ន្ធជុំវិញខេត្ត សណ្ឋាគារ ភោជនីយដ្ឋាន សហគមន៍ទេសចរណ៍ និងប្រតិបត្តិករទេសចរណ៍យ៉ាងច្រើនកុះករ។

សិក្ខាសាលានេះ ត្រូវបានរៀបចំឡើងក្នុងគោលបំណង៖
ធ្វើការផ្សព្វផ្សាយឲ្យបានទូលំទូលាយ "ស្តង់ដាធុរកិច្ចបៃតងក្នុងវិស័យទេសចរណ៍លើកទី៤" "ស្តង់ដាបដិសណ្ឋារកិច្ចល្អក្នុងវិស័យទេសចរណ៍លើកទី២" និង "ស្តង់ដាបង្គន់សាធារណៈកម្ពុជាលើកទី២" ដល់ប្រតិបត្តិករទេសចរណ៍ និងជម្រុញអោយមានការចុះឈ្មោះតាមប្រព័ន្ធ Online អោយបានច្រើន ដើម្បីឈានទៅទទួលរង្វាន់នាពេលខាងមុខ។

គួរបញ្ជាក់ថា ៖
-ស្ដង់ដាធុរកិច្ចបៃតងក្នុងវិស័យទេសចរណ៍មាន៧ប្រភេទរង្វាន់
-ស្តង់ដាបដិសណ្ឋារកិច្ចក្នុងវិស័យទេសចរណ៍ផ្តោតលើ ០៥គោលការណ៍ណែនាំ
-ស្តង់ដាបង្គន់សាធារណៈកម្ពុជា ផ្តោតលើ ០៧សូចនាករ។