ថ្ងៃទី២៦ ខែកញ្ញា ឆ្នាំ២០២៣--សិស្សានុសិស្សចំនួនជាង១លាននាក់ នៅតាមសាលារៀនជាង ១ ០០០ សាលា ទូទាំងប្រទេស បានចូលរួមក្នុងយុទ្ធនាការកាត់បន្ថយការប្រើប្រាស់ប្លាស្ទិក និងបានប្តេជ្ញាចិត្តថា «ថ្ងៃនេះ ខ្ញុំមិនប្រើថង់ប្លាស្ទិកទេ» ។ នេះជាការលើកឡើងរបស់ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នាថ្ងៃទី២៥ ខែកញ្ញា ឆ្នាំ២០២៣ ក្នុងឱកាសជួបសំណេះសំណាល ជាមួយថ្នាក់ដឹកនាំ និងមន្រ្តីរាជការក្រសួងបរិស្ថាន។

ឯកឧត្តមបណ្ឌិត អ៊ាង សុផល្លែត បានគូសបញ្ជាក់ថា នេះជាជោគជ័យមួយ ដែលយុទ្ធនាការដែលបានគ្របដណ្តប់នៅទូទាំងប្រទេស ហើយលទ្ធផលខាងលើ បានបង្ហាញពីការយកចិត្តទុកដាក់ ក្នុងការចូលរួមកាត់បន្ថយការប្រើប្រាស់ថង់ប្លាស្ទិក ពីគ្រប់ភាគីពាក់ព័ន្ធ ទាំងស្ថាប័នរដ្ឋ វិស័យឯកជន អាជ្ញាធរមូលដ្ឋានគ្រប់លំដាប់ថ្នាក់ ព្រមទាំង លោកគ្រូអ្នកគ្រូ និងសិស្សានុសិស្ស នៅតាមសាលារៀនទូទាំងប្រទេស។ ឯកឧត្ដមបានបញ្ជាក់ថា ចំពោះកម្មករ កម្មការិនី ចំនួនប្រមាណ១ម៉ឺននាក់ នៅតាមរោងចក្រ សហគ្រាស ចំនួនជាង១០ នៅរាជធានីភ្នំពេញ និងក្រុងព្រះសីហនុ ក៏បានចូលរួមយុទ្ធនាការកាត់បន្ថយការប្រើប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» ដែលកំណត់ការចាប់ផ្តើមពីថ្ងៃទី២២ ខែកញ្ញា ឆ្នាំ២០២៣។

សូមបញ្ជាក់ថា ក្រសួងបរិស្ថានបានបង្កើតយុទ្ធនាការកាត់បន្ថយការប្រើប្រាស់ថង់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» ក្រោមគំនិតផ្តួចផ្តើម របស់ឯកឧត្តមបណ្ឌិត អ៊ាង សុផល្លែត នៅថ្ងៃទី០១ ខែកញ្ញា ឆ្នាំ២០២៣ ដើម្បីលើកកម្ពស់សុខុមាលភាពប្រជាពលរដ្ឋ សោភ័ណភាពទីក្រុង និងមូលដ្ឋាន ឱ្យបានប្រសើរឡើងបន្ថែមទៀត ព្រមទាំងលើកស្ទួយសេដ្ឋកិច្ចជាតិផងដែរ តាមរយៈការលើកកម្ពស់ការប្រើប្រាស់ផលិតផលក្នុងស្រុកជំនួសថង់ប្លាស្ទិក។ យុទ្ធនាការនេះ ចាប់ផ្តើមដំបូង នៅតាមសាលារៀនទាំង៤៤ នៅក្នុងស្រុកអូររាំងឪ ខេត្តត្បូងឃ្មុំ និងមានសិស្សានុសិស្ស ចូលរួមសរុប ចំនួនជាង ១៨ ៧០០ នាក់។ បច្ចុប្បន្នយុទ្ធនាការនេះ បាននិងកំពុងបន្តអនុវត្តន៍ នៅតាមសាលារៀន ក្នុងរាជធានី និងខេត្តផ្សេងៗទៀតទូទាំងប្រទេស។ 

ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថានបានថ្លែងបន្ថែមថា យុទ្ធនាការការកាត់បន្ថយការប្រើប្រាស់ថង់ប្លាស្ទិកនេះ ទាមទារការចូលរួមអនុវត្តពីគ្រប់ភាគីពាក់ព័ន្ធ ទាំងស្ថាប័នរដ្ឋ វិស័យឯកជន ដៃគូអភិវឌ្ឍន៍ និងសង្គមស៊ីវិល ព្រមទាំង លោកគ្រូ អ្នកគ្រូ សិស្សានុសិស្ស នៅតាមសាលារៀន និងជាពិសេសកម្មករ កម្មការិនី នៅតាមរោងចក្រ សហគ្រាស និងប្រជាពលរដ្ឋទាំងអស់គ្នា ទើបយុទ្ធនាការនេះអាចសម្រេចជោគជ័យ ប្រកបដោយប្រសិទ្ធផល និងប្រសិទ្ធភាពខ្ពស់៕