សារមន្ទីរជាតិរឹតបន្តឹងការគ្រងសម្លៀកបំពាក់បុរាណសម្រាប់ថតនៅទីតាំងរបស់ខ្លួន
សារមន្ទីរជាតិបានប្រកាសរឹតបន្តឹងអាជីវករដែលផ្តល់សេវាជួលសម្លៀកបំពាក់បុរាណសម្រាប់ការថតរូបអតិថិជនរបស់ពួកគេនៅសារមន្ទីរជាតិក្រុងភ្នំពេញ ដោយសារតែការមិនបានស្នើសុំការអនុញ្ញាតមុននឹងចូលទីតាំងសារមន្ទីរជាតិដើម្បីថតរូប ហើយសម្លៀកបំពាក់បុរាណដែលពួកគេប្រើប្រាស់សម្រាប់ថតក៏មិនមានការអនុញ្ញាតពីក្រសួងវប្បធម៌និងវិចិត្រសិល្បៈទៅទៀត។
សារមន្ទីរជាតិបាននិយាយក្នុងសេចក្ដីប្រកាសព័ត៌មានកាលពីថ្ងៃពុធថា ការរឹតបន្តឹងនេះមិនមែនមានន័យថា សារមន្ទីរជាតិកម្ពុជាមិនគាំទ្រដល់វិស័យឯកជនក្នុងការផ្សព្វផ្សាយលើកតម្លៃវប្បធម៌ខ្មែរ ប៉ុន្តែដើម្បីចៀសវាងការរិះគន់ពីមហាជន ក៏ដូចជាការស្តីបន្ទោសពីថ្នាក់ដឹកនាំក្រសួងមកលើសារមន្ទីរជាតិ នៅពេលដែលពួកគេប្រើប្រាស់សម្លៀកបំពាក់បុរាណខុសនឹងទម្រង់ដើមដើម្បីថត។
នៅក្នុងសេចក្ដីប្រកាសព័ត៌មានបន្តថា៖ «អាជីវករបានប្រើប្រាស់ស្ថាប័នរដ្ឋក្នុងការផ្តល់សេវាកម្មសម្រាប់ប្រយោជន៍ផ្ទាល់ខ្លួនដោយគ្មានការអនុញ្ញាត។ ហេតុនេះសារមន្ទីរជាតិចាំបាច់ត្រូវមានវិធានការទប់ស្កាត់មួយចំនួន រាប់ទាំងការហាមឃាត់ ឬផ្អាកសកម្មភាពថតរហូតដល់សារមនី្ទរជាតិបានទទួលការណែនាំឬអនុញ្ញាតពីក្រសួងវប្បធម៌និងវិចិត្រសិល្បៈជាមុនសិន»។
សារមន្ទីរជាតិបានណែនាំដល់អាជីវករទាំងនោះថា៖ «អាជីវករចាំបាច់ត្រូវទាក់ទងទៅក្រសួងវប្បធម៌និងវិចិត្រសិល្បៈ ដើម្បីសុំការឯកភាពលើគំរូសម្លៀកបំពាក់ដែលត្រូវប្រើប្រាស់សម្រាប់ជួលដល់អតិថិជនរបស់ខ្លួន»។
សារមន្ទីរជាតិបញ្ជាក់ថា នេះមិនមែនជាការតឹងតែងឡើយ ប៉ុន្តែវាជាការជួយក្រើនរំលឹកក្នុងនាមសេនាធិការរបស់ក្រសួងវប្បធម៌និងវិចិត្រសិល្បៈ ព្រោះកន្លងមកជំហររបស់ថ្នាក់ដឹកនាំសារមនី្ទរជាតិតែងតែសម្របសម្រួលជូនសាធារណជនអាចចូលប្រើប្រាស់ទីតាំងសារមនី្ទរជាតិក្នុងករណីមានការស្នើសុំជាមុននិងបានទទួលការអនុញ្ញាតពីក្រសួងវប្បធម៌និងវិចិត្រសិល្បៈ។
សារមន្ទីរជាតិបញ្ជាក់បន្ថែមថា កន្លងមកក៏មានករណីប្រើប្រាស់សម្លៀកបំពាក់បុរាណខុសឆ្គងមួយចំនួនដែរ ជាពិសេសការប្រើប្រាស់ពណ៌ ការរចនាគ្រឿងអលង្ការ ម្កុដ និងស្បៃបន្ថែមលើឈុតបុរាណ។ ហេតុនេះទើប
សារមនី្ទរជាតិស្នើយោបល់ពីអ្នកជំនាញរបស់ក្រសួងវប្បធម៌និងវិចិត្រសិល្បៈ ដើម្បីចៀវាងកំហុសឆ្គងក្នុងការផ្សព្វផ្សាយដែលប្រាសចាកទម្រង់ដើមនិងគ្មានមូលដ្ឋានច្បាស់លាស់។
លោក យូ សភា សាស្ត្រាចារ្យវប្បធម៌និងអរិយធម៌ខ្មែរនៅសាកលវិទ្យាល័យភូមិន្ទភ្នំពេញ បានលើកឡើងថា ជាធម្មតានៅក្នុងក្រសួងស្ថាប័ននីមួយតែងតែបទបញ្ញតិផ្ទាល់ខ្លួន ដើម្បីរក្សានិងការពារបាននូវទម្រង់ដើមស្របតាមទម្រង់ដើម ហើយការអនុវត្តតាមបទបញ្ញតិនោះនឹងគ្មានផលប៉ះពាល់ឬប្រាសចាកនឹងទម្រង់ដើម។
លោកនិយាយថា ការធ្វើបែបនេះមិនត្រឹមតែបានបណ្ដុះចំណេះដឹងដល់មនុស្សជំនាន់ក្រោយយល់ដឹងច្បាស់នូវការស្លៀកពាក់សម្លៀកបំពាក់បុរាណត្រឹមត្រូវនឹងអ្វីដែលជាមរតកដើមនៃវប្បធម៌ខ្មែរបុរាណប៉ុណ្ណោះទេ ប៉ុន្តែវាថែមទាំងបានបណ្ដុះគំនិតអភិរក្សដល់យុវជនខ្មែរជំនាន់ក្រោយទៀតផង។
លោកបន្តថា៖ «ការរឹតបន្តឹងខ្លាំងពេក ក៏អាចជះផលអវិជ្ជមានបន្តិចបន្តួចមកលើការផ្សព្វផ្សាយវប្បធម៌ផងដែរ ព្រោះអាចធ្វើឱ្យអ្នកស្រឡាញ់និងមានបំណងផ្សព្វផ្សាយវប្បធម៌ជាតិលែងមានអារម្មណ៍ប្រើប្រាស់សម្លៀកបំពាក់បុរាណសម្រាប់ថតរូប ដែលធ្វើឱ្យការប្រើប្រាស់សម្លៀកបំពាក់ប្រពៃណីបុរាណកាន់តែមានការថយថយចុះជាក់ជាមិនខាន»។
លោកបញ្ជាក់ថា៖ «នេះជាការខាតបង់ប្រយោជន៍បន្តិចបន្តិចបើធៀបនឹងការរក្សា
សម្លៀកបំពាក់បុរាណតាមទម្រង់ដើម។ ដូច្នេះសម្រាប់អ្នកស្រឡាញ់វប្បធម៌ដើមរបស់ខ្មែរគួរអនុវត្តការណែនាំរបស់គេ ហើយស្ថាប័នសាមីក៏គួរមានវិធីសាស្ត្រណាមួយដើម្បីការបន្ធូរ
បន្ថយនូវវិធានការដើម្បីពួកគេជួយផ្សព្វផ្សាយវប្បធម៌ដើមរបស់ខ្មែរយើង»។
កាលពីខែមីនាកន្លងមកនេះ លោកនាយករដ្ឋមន្ត្រី ហ៊ុន សែន បានបង្ហាញពីយកចិត្តទុកដាក់ជាខ្លាំងចំពោះការអភិរក្សសម្លៀកបំពាក់បុរាណខ្មែរក្នុងទម្រង់ដើម ដើម្បីចៀសវាងប្រទេសជិតខាងចោទកម្ពុជាលួចចម្លងវប្បធម៌របស់គេ ពីព្រោះវប្បធម៌កម្ពុជាមានលក្ខណៈស្រដៀងគ្នានឹងវប្បធម៌របស់ប្រទេសជិតខាងទាំងនោះ។
លោកនាយករដ្ឋមន្ត្រីបាននិយាយនៅពេលនោះថា ការបង្ហាញវប្បធម៌សិល្បៈខ្មែរដល់ប្រទេសពលរដ្ឋខ្មែរនាពេលបច្ចុប្បន្ននិងជំនាន់ក្រោយ ជាការល្អហើយ ប៉ុន្តែបើការបង្ហាញមិនត្រឹមត្រូវតាមទម្រង់ដើមស្មើនឹងបំផ្លាញនូវវប្បធម៌ខ្មែទៅវិញ៕
