ប្រសាសន៍សំខាន់ៗរបស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ទាក់ទងនឹងទេសចរណ៍ម្ហូបអាហារ ថ្លែងក្នុងពិធីបើកសន្និសីទអន្តរជាតិលើកទី១ ស្ដីពីទេសចរណ៍ម្ហូបអាហារកម្ពុជា នាថ្ងៃទី២១ ខែសីហា ឆ្នាំ២០១៩ នៅសណ្ឋាគាររ៉េស៊ីដង់សុខាភ្នំពេញ មានខ្លឹមសារដូចខាងក្រោម៖

* អង្គការទេសចរណ៍ពិភពលោកបានរៀបចំសន្និសីទស្តីពី ទេសចរណ៍ម្ហូបអាហារ នេះ បានចំនួន ០៥លើក រួចមកហើយ ចាប់តាំងពីឆ្នាំ២០១៥ ហើយព្រឹត្តិការណ៍នេះ បានប្រមូលផ្តុំគំនិត និងការចែករំលែកបទពិសោធន៍ ការអនុវត្តល្អៗ អំពីតួនាទីដ៏សំខាន់នៃវិស័យទេសចរណ៍ម្ហូបអាហារ ក្នុងការចូលរួមសម្រេចការអភិវឌ្ឍប្រកបដោយចីរភាព។

* ប្រទេសជាសមាជិកអាស៊ាន ក៏បានផ្តួចផ្តើមពង្រឹងកិច្ចសហប្រតិបត្តិការលើទេសចរណ៍ម្ហូបអាហារនេះ ដោយកំពុងរៀបចំដាក់ចុះឲ្យមាន ផែនការមេអភិវឌ្ឍទេសចរណ៍ម្ហូបអាហារអាស៊ាន (ASEAN Gastronomy Tourism Master Plan)។

* វិស័យទេសចរណ៍ និងម្ហូបអាហារ មានទំនាក់ទំនងជាសារវ័ន្ត យ៉ាងតិចលើវិសាលភាពចំនួន ២គឺ៖ ម្ហូបអាហារជាផលិតផលទេសចរណ៍ ឬសេវាកម្មទេសចរណ៍ (Gastronomy Tourism Product) និងម្ហូបអាហារជាចំណែកទីផ្សារទេសចរណ៍ (Market Segment)។ ក្នុងសមាសភាពជាសេវាកម្មទេសចរណ៍ ម្ហូបអាហារចូលរួមដល់ការបង្កើតភាពចងចាំដល់ទេសចរ អំពីគោលដៅដែលបានទស្សនា។

* ម្ហូបអាហារជាទូតនាំសារអំពី វប្បធម៌ អត្តសញ្ញាណ ការរស់នៅក្នុងតំបន់ ទៅទេសចរជាតិ និងអន្តរជាតិ។ ការកែច្នៃ ចងក្រងខ្លឹមសារ បកស្រាយបង្ហាញអំពីម្ហូបអាហារ ដែលជាសម្បត្តិវប្បធម៌ បេតិកភណ្ឌទាំងនេះ នឹងចូលរួមលើកកម្ពស់ជីវភាពរស់នៅរបស់ប្រជាពលរដ្ឋក្នុងតំបន់នោះផងដែរ តាមរយៈការមកដល់នៃទេសចរជាតិ និងអន្តរជាតិ។

* តាមការសិក្សារបស់ UNWTO ទេសចរវប្បធម៌ រួមមានអាហារដែរនោះ មាន ៤០% នៃទេសចរសរុប មានន័យថា អាហារជាកត្តានៃការសម្រេចចិត្តជ្រើសរើសគោលដៅទស្សនា។

* យោងតាមការស្រាវជ្រាវរបស់សមាគមការធ្វើដំណើរម្ហូបអាហារពិភពលោក (World Gastronomy Travel Association) ទេសចរចំណាយជាមធ្យម ២៥% លើចំណីអាហារ ប្រែប្រួលពី ១៥% ទៅ ៣៥% អាស្រ័យតាមគោលដៅនីមួយៗ។

* ទេសចរណ៍ម្ហូបអាហារ មិនត្រឹមតែចូលរួមទាក់ទាញទេសចរជាតិ អន្តរជាតិ លើកកម្ពស់ជីវភាពប្រជាពលរដ្ឋ និងលើកតម្កើងប្រពៃណី បេតិកភណ្ឌជាតិប៉ុណ្ណោះទេ ថែមទាំងចូលរួមបង្កើតការងារបន្ថែម ជំរុញសហគ្រិនភាព ការបង្កើតថ្មី និងភាពច្នៃប្រឌិត ផងដែរ។

* វិជ្ជាជីវៈផ្នែកម្ហូបអាហារ ទាមទារទាំងឆន្ទៈ ចំណេះដឹង ជំនាញ ឥរិយាបថខ្ពស់ សិល្បៈ និងគំនិតច្នៃប្រឌិត ដែលមិនអាចខ្វះបាន។ ការអភិវឌ្ឍវិស័យទេសចរណ៍ម្ហូបអាហារ ពិតជានាំមកនូវការរីកចម្រើនផ្នែកអាជីពក្នុងវិស័យទេសចរណ៍ ជាពិសេសចូលរួមទប់ស្កាត់ចំណាកស្រុក និងបង្កើនស្មារតីស្រលាញ់ជាតិមាតុភូមិ។

សូមទាញយកឯកសារសុន្ទរកថាបើករបស់ឯកឧត្តម ថោង ខន តាមរយៈ Link ដូចខាងក្រោម៖

http://bit.ly/2HhNyYW