(ក្រចេះ) នៅព្រឹកថ្ងៃទី២០ ខែសីហា ឆ្នាំ២០១៩៖ ក្រសួងទេសចរណ៍ មន្ទីរទេសចរណ៍ខេត្តក្រចេះ សហការជាមួយអគ្គស្នងការនគបាលជាតិ បានបើកសិក្ខាសាលាស្តីពី “ការពង្រឹងសន្តិសុខ និងសុវត្ថិភាពទេសចរ” ក្រោមអធិបតីភាពឯកឧត្តម ហោ សារុន អនុរដ្ឋលេខាធិការក្រសួងទេសចរណ៍ លោកជំទាវ ខាំ សុភាព អភិបាលរងនៃគណៈអភិបាលខេត្តក្រចេះ និងឧត្តមសេនីយ៍ទោ ហឿង សំអុល អនុប្រធាននាយកដ្ឋាននគបាលទេសចរណ៍ នៅសាលប្រជុំសណ្ឋាគារ ហ៊រ ប៊ុន្នី ខេត្តក្រចេះ ព្រមទាំងមានមានការចូលរួមពីតំណាងមន្ទីរអង្គភាពជុំវិញខេត្ត នគបាលមានសមត្ថកិច្ច សាលាក្រុង ក្រុមប្រឹក្សាសង្កាត់ ប្រតិបត្តិករទេសចរណ៍ យុវជនស្រលាញសន្តិភាព យុវជន ស.ស.យ.ក និងសិស្សនិស្សិត សរុមប្រមាណ ១២៣នាក់។

សិក្ខាសាលានេះមានគោលបំណងដើម្បីពង្រឹងការយកចិត្តទុកដាក់ខ្ពស់លើការងារបដិសណ្ឋារកិច្ចភ្ញៀវទេសចរ ព្រមទាំងផ្សព្វផ្សាយ និងពង្រឹងបញ្ហាសន្តិសុខ ដើម្បីធានាឲ្យបាននូវប្រសិទ្ធភាពខ្ពស់ក្នុងការរក្សាសន្តិសុខ សុវត្ថិភាពទេសចរក្នុងខេត្តឲ្យបានល្អប្រសើរ ជាពិសេសការចូលរួមសហការពីផ្នែកឯកជន អាជ្ញាធរដែនដី និងសមត្ថកិច្ចគ្រប់លំដាប់ថ្នាក់ ក្នុងការរក្សាសន្តិសុខ សុវត្ថិភាពទេសចរតាមមូលដ្ឋានអាជីវកម្ម សេវាកម្មទេសចរណ៍ និងគោលដៅទេសចរណ៍នានាក្នុងខេត្តក្រចេះ។

ឯកឧត្តម ហោ សារុន មានប្រសាសន៍ថា ដើម្បីទទួលបានភ្ញៀវទេសចរឲ្យបានកាន់តែច្រើន ជាយុទ្ធសាស្រ្ត គឺត្រូវធ្វើឲ្យកម្ពុជាក្លាយជាគោលដៅទេសចរណ៍ប្រកបដោយភាពទាក់ទាញ និងផ្តល់ភាពកក់ក្តៅដល់ភ្ញៀវទេសចរ តាមរយៈការបង្កើតឲ្យមានផលិតផលថ្មីៗ និងប្រកបដោយភាពឆ្លាតវៃ ស្អាតបៃតង់ និងរក្សាសុខសុវត្ថិភាពទេសចរឲ្យបានល្អប្រសើរ៕